Seppus Troum 🎎
Der Seppu sött äntlige e Frou ha,eini wo isch zum Wärche da.
Si sött ihm choche, putze u wäsche
aber sött nid si; e Chlappertäsche.
Lang hett'er sich scho ume g'luegt,
doch keini isch für ihn gnue guet.
Die Einti het z'viel Späck dranne gha,
a der Angere isch ja fasch nüt dra,
die Dritti het ihm z'chrummi Bey,
die Vierti gfallt ihm süsch nüt, ney.
Abah, jetz schickt'er sich halt dry
u lat das Hürate eifach la sy.
Längs u Breits studiert er hin u här
wie das doch ömu o gäbig wär
wen är sones Maschineli hätt
wo d Hushaltig miech u usrupfti ds Gjät.
Da hei si erfunde e moderni Ruumfähre,
e Sputnik u Satellite si i der Atmosphäre,
aber e so nes kumods Maschineli erfinde,
wo me so chätzers guet chönnt bruche da unge,
das isch ne eifach nie i Sinn cho.
Es isch e Jammer das nüt e so.
Lang chöiet der Seppu dänk no da dranne,
gschyd fingt är se nid, die Erfindermanne.
~~~ Marie Burri ~~~
Früecher 💴
Früecher, wo mer no si i d Schuel gange,üser Haarzöpf hei la über d Rügge hange,
wie isch es doch trotz Armuet schön gsi.
Ersch später gseht me das z grächtem i.
Mir hei no nüt gwüsst vo Fernseh u Radio
u si derby ganz guet vürcho.
Vo der Mode hei mer is nid hert la plage,
hei meischtens Chleider vo Grössere ustrage.
S’schad nüt, we me Jung nid alls cha ha
was me sech wünscht u was me wetti ha.
A ds Besserläbe cha me sich ring gwöhne,
hingäge wes schlächter wird, git es de z'stöhne.
O d Gsundheit lehrt me ersch denn schetze
we me het so läschtig Bräschte.
Es isch o guet, we me nid weis zum vorus
was eim cha warte ds Läbe dürus.
E schlächte Bricht miech eim schwärmüetig,
e Guete vielicht z übermüetig.
Besser isch es, mi mög alls geduldig erwarte,
als sich la wahrsäge us de Charte.
Wärsch bis z letscht uf all Fäll bschisse,
sowieso en Angere tuet d Charte mischle.
~~~ Marie Burri ~~~
📈? ? ? ? ?
Was wird doch hüt so zämegschtudiert,alls Verruckts wird usprobiert.
Ganz Hüüffe Lüt wett z mingscht Diräkter wärde
oder grossi Erfinder uf Aerde.
Mit zviel Gschtudierte hockt me uf em falsche Dampfer,
was es geng no brucht, si tüechtegi Chrampfer.
Was wär e Diräkter ohni Lüt wo arbeite?
Er wär gly uf der Schnure, wär gly Pleite.
Was wär e Dirigänt ohni Chor wo tuet singe?
E komeschi Figur, wen er glych e Taktstock würdi schwinge.
Viel wo erfunde wird, tuet niemerem nütze;
es si nume eifach so nöimödeschi Götze.
We zersch no öppis Guets isch dra gsi,
bis z letscht mues es vertüflet si.
Mänge hätt sich scho im Grab umdrähit.
wen er gsäch, was er het gsähit.
O der Einstein wär gschyder e chly dümmer gsi,
de wär d Atombombe vielicht no hüt e Utopie.
Jetz hei d Amerikaner ume öppis Gfährlichs i ds Wältall usegjagt -,
dass die o nid ds schlächte Gwüsse plagt,
aber äbe, wär keis het mues sich o nid la plage.
Lieber als verzichte, tuet me d Wält i d Luft jage.
Jetz müesse sich de ume d Russe a de Hammelbey schrisse
u no öppis Verrückters luege uf z risse.
I gloube afe ganz fescht dra,
dass d Wält wäge z'gschyde Lüt mues i Stücki gah.
~~~ Marie Burri ~~~
Die Chlyne u die Grosse
S’isch geng es so gange u wird geng e so si,di grosse Lüt luege über die Chlyne i.
Das gilt nid nume für d Körperlengi,
s’git chlyni Grossi e ganzi Mengi.
Das si die wo über ämter uGäld verfüege,
die mache sich druus es grosses Vergnüege,
die Chlyne ungerem Dume z ha
u se ja nid öppe viel Luft schnappe z la.
Jetz söll de der Hypothekarzins ume ufe gah,
für was isch ömu o der Prysüberwacher da?
Dänk für ne grosse Lohn z kassiere,
süsch tuet ömu da nid viel passiere.
De Chlyne drückt me ds Gurgeli zue,
die Grosse luege (d Häng i de Seck) zue.
Es chönnt ja eim vo däne Here glinge,
amene Arbeiter sys schwär erwärchete Hüsli z erringe.
Es sött jetz eifach de angers gah.
Die Chlyne müessti emal obedra stah.
Doch äbe leider - i förchtes scho -
würd e Teil vo de Chlyne, als Grossi, de o der GW übercho.
U scho fieng ume d Korruption a
u scho wär viel Chlyni ume unnedra.
Ob da emal Irgendöpper irgendöppis dergäge mache cha?
~~~ Marie Burri ~~~
Rede u laa rede 😚
Es isch mer scho gseit worde, i sött mi besser informiere,sött Zytig läse, Radio lose u die Brichte guet schtudiere,
süsch chönn me ja nid hälfe diskutiere,
müess schtumm dernäbe hocke u sich schiniere.
Mier isch das glych, i wott mit rede nid chönne brilliere,
nid derglyche tue, i chönn alls u jedes gnau analysiere.
Mi cha sich o bym zuelose rächt guet amüsiere,
wie verschide doch d Meinige si u ds Geschtikuliere.
Jede meint, nume är heig rächt, das müess doch e Normale gschpüre,
derby cha sich o der Gschydschti mängisch wüescht trumpiere.
I tue o viel über alls müglichs nacheschtudiere,
tue der Chopf schüttle über d Art wie d Politiker z Bärn tüe regiere,
doch weis i nid, ob ig de besser chönnt kutschiere
oder ob i am änd der Chare z vollem i Dräck würd buxiere.
Drum tuen i gschyder ds Schwyge üebe,
aus über Sache won i zweni kenne, hälfe debattiere.
~~~ Marie Burri ~~~
>Warum❔
Warum sucht me o geng by de Lüte nach Fähler?Meischtens hätt me mit de Eigete z tüe gnue.
Warum gits so viel Halb- u Ganzlugierzähler?
Für die eigete Untugete z verharmlose, mit gits nume nid zue.
Warum tüe viel Lüt müglichscht viel Gäld zämechraue?
Viel wöhler isch me doch, we me nume het was me brucht,
de gits nach em Tod by de Erbe nüt z raue,
nüt z prozidiere u z dröie mit der Fuscht.
Warum cha me by de Angere nid es Oug zuedrücke?
Vielicht wär es eim sälber o wöhler derby
wen es eim wenigschtens albeneinisch würd glücke,
chly besser u nachsichtiger mitenang z si.
~~~ Marie Burri ~~~
S'isch gäng e so gange
E Schneeflocke chunnt süferli obenache cho z schwäbe.Gsesch ds Glüntli im Wäg - setz di lieber dernäbe.
Si het ihre Louf nümme chönne ufhaa
hett i däm Dräckwässerli müesse z Grund ga.
E Angeri hetts abgseh uf my Hang,
i nime se uf e Ermel, dä isch nid e so warm.
Si tuet sich für ihres Läbe rächt wehre
doch düecht mi, i müess scho ihre letscht Süfzger ghöre.
E Dritti het sich i ds chüehle Gras gsetzt,
das isch es Plätzli wo si schetzt.
Si füehlt sich wohl u macht sich breit,
so möcht si blybe bis i d Ewigkeit.
So geits o mit üs Mönscheching,
nid jedes fingt es Bettli ling.
Teil chöi nid blybe lang uf ärde,
müesse gly scho ume Wassertröpfli wärde.
Angeri tüe sich tapfer wehre,
luege sich geng uf die bescht Syte z chehre.
Nid Allne tuet es ganz glych grate,
e Teil überchunnt d Härdöpfu, die Angere der Brate.
Die Dritte gheie grad i nes weichs Bett
wo der Vatter für se guet uspolschteret hett.
Si gniesses - bekümmere sich nüt um de Mitmönsche ihres Läbe,
doch früecher oder schpäter müesse o riichi Lüt schtärbe.
~~~ Marie Burri ~~~
🌤 e trüebe Sunntig
Der Näbu isch hüt ume dick,bis zum Choletehöltzli geit knapp der Blick.
Ringsume gsesch nume so schmuslegi Watte,
grau schtatt grüen si alli Matte.
Warm isch es o nid, i bi dusse gsi,
ha scho am waggele vo de Eschtli gseh, dass d Bise tuet zieh.
Es wird e Schtubehockersunntig gä,
was chönnt i ächt öppe ungernäh?
Ach, irgendwie wird scho der Aabe cho,
we me am Wärchtig chönnt wärche, gniessti me e settige Sunntig no.
Mi chäm chli ab de müede Füesse
oder chönnti zfride es schöns Buech gniesse.
Viel z churz wär de am änd der Sunntig
u nume z gly chäm eim der Mäntig.
Früecher han i dänkt, wie schön dass Ferie chönnti si,
jetz han i se - u bi gar nid öppe so glücklech derby.
~~~ Marie Burri ~~~
💆 Yfersucht
Es wachst es Chrut, das heisst Yfersucht.Das het keni Blüemli aber e schtächige Duft.
Us herte Pöueli tropfet e giftige Saft
wo us gsunge Mönsche Chranknigi macht.
Der Franz git im Bruef si ganzi Chraft
u het sich so höcher u höcher gschafft.
Won er meint, jetz heig er de gly der Gipfel gwunne,
schteit ihm plötzlich der Fritz vor der Sunne.
Däm schynt der Ufschtyg ganz müehelos z gah,
är schtygt verby - lat der Fanz la schtah.
Scho fat das Tüfelschrut a kime
u tuet dä arm Franz über Nacht ganz yliire.
Es wörgt ne ab - es frisst ne uf,
das böse Chrut nimmt ihm der Schnuuf.
D Pöueli tüe ihres Gift verschprütze,
cha sich ächt der Fritz dervor schütze?
D Chemie produziert Schprützmittel gar viel,
eis z'finge gäge d Yfersucht, wär es wichtigs Ziil.
Doch schteit das halt nid i re Chermikerhang.
Das Böse wuecheret scho syt Eva u Adam.
~~~ Marie Burri ~~~
Es Chlagelied
Hüt hei mer scho der erschti Schnee,i chönnt druf verzichte je länger je meh.
Jetz chan i de erscht rächt nümme guet louffe.
Muess mer ächt e Motorschlitte chouffe?
So eine wär ällwäg für mys Portmonee z tür,
drum lan is dänk gschyder la si für hür.
Gägewärtig chan i üsi Milch nümme ga reiche,
wäge mym chrankne, lingge Scheiche.
Jetz muess i halt i der Stube blybe
u mer da probiere d Zyt z'vertrybe.
I hätt gärn a mine nöie Fürte g’schnurpft,
ha die nötige Sache alli scho vüre g’rupft,
aber i cha ja my Trättnähjmaschine nid tschalpe,
so weh tuet mer hüt my lingg Hingertalpe.
D Tablette hei der Wäg i Fuess abe nid g’funde,
dä wott ömu eifach gar nid gsunde.
D Barbara chunnt mit Tüfelschralletee derhär,
i wett das Chacheli wär scho läär.
Muess fasch dra gloube, dass er öppis tuet nütze
u tapfer die bitteri Brüehi abe schlücke.
Tue Kitta-Scheel schtriche uf das gschwullne Glänk,
bis jetz hetts nüt g’nützt, es blybt mer, das Gschänk.
We der Herr Dokter doch nume es guets Bäseli hätt
u mit däm myner Bräschte furtwüsche tät.
Es si halt geng o no zwee Finger oder drei
wo mi eifach nid i Rueh la wei.
Drum, wen ig überhoupt no chönnt singe,
würd all mini Lieder in Moll erklinge.
~~~ Marie Burri ~~~
💉A die liebe Lüt im Inselschpital💐
Jetz hei sy mi scho achtzäche Jahr ertrageU derby geduldig abglost aune myne Chlage.
I all dere Zyt bin i nünenünzg Prozänt z'fride gsy,
drum möcht i o lieber niene angers hi.
Nume zwöi-drümal isch es mer vorcho
i heig e Fliessbanddokter oder öppis e so.
Grüessech, wie geit’s? Fahret so wyter, chömet wider
u de isch doch alles ganz glich blibe leider.
Aber de isch ume e nöie Herr Dokter cho,
wo sich mit mer wieder alli Müeh het gnoh.
Scho ds gschpüre, dass’ne nid glych isch wies eim geit
hilft eim e Blätz wyt; i has daheim mängisch gseit.
I der Rheumaklinik bin i nie enttüscht worde,
wäge däm füehlen i mi hie richtig geborge,
drum möcht i einisch em Dokter u de Schwöschtere danke
o allne won i nid kenne, wo sich kümmere um die Chranke.
~~~ Marie Burri ~~~
E gueti Nachricht
Jetz het schyns öpper d Ursach entdecktvo der Arthritis, wo d Glänk e so feckt.
Si heis am Fernseh mit der Füürwehr vergliche,
wo nes Füür, wo nid brönne tuet, geit ga lösche.
Si müesse jetz de no es Mittel ha,
wo der Wasserschade i Gränze ma b’ha.
Mi gseht ömu afe e Silberstreife am Horizont
u hoffet, dass es mit der Zyt de scho guet chunnt.
I für mi cha da dänk nüt me dervo profitiere,
s geit lang, bis si öppis hei u chöi usprobiere.
De junge u nöie Patiänte wärs z gönne,
we si die Chrankheit nid z guet müessti lehre kenne.
S wär Zyt, das Rheumabähnli chäm zum Stillstand
wo umesuret, hüt i Fuess oder Ellboge u morn i der Hand.
Hoffentlich si de syner Stunde zellt
u die Weiche richtig gschtellt.
Ab mit der, Züügli, i d Verschrottig;
es het di ganz u gar niemer nötig.
~~~ Marie Burri ~~~
Chatzejammer
Der Hans isch zur Nachbarin ga chlage, wie ihn ömu o d Arthritis tüei plage.
Die beide Achsle tüei ihm e so weh,
är heig kei Grund zum Lache meh.
Kathrin seit, ihrem Maa gangs o so,
är heig Schmärze im Ellboge u wüss nid vo wo.
Der Chrischte chunnt lahm derzue cho z trappe,
är luegt suur dri unger syr Zöttelichappe.
Arthrose heig är i de Chnöi,
es sig afe guet, heig er nume zwöi.
Bym Abhocke u Ufha heig er Müeh,
är chönn chum no mälche syner Chüeh.
D Schwägeri heig ganz verchrüppleti Häng,
we si scho syt Jahre alls mügliche aawäng.
U ig arme Tropf mues grad alls zäme ha.
Niene wei d Schmärze ändlich nalah.
Im Äcke tuets gusle, uf der Bruscht no fasch meh;
gseh gägewärtig gwüss chum Heiteri meh.
I wär nümm e Frösch wo i der Milch schwümme tät
bis er es Bärgli von Anke ungerem Hingere hätt.
I liess mi eifach grediache la gheie
u uus u amen wärs mit der Mareie.
~~~ Marie Burri ~~~
E Hampfele Wünsch
Möcht so gärn no Lieder singe,i Gedanke chan i d Melodie scho no finge,
aber d Schtimm, die tuet mer halt versäge
drum lan is gschyder ungerwäge.
Möcht o gärn no ga marschiere,
jetz chan i mängisch chum schpaziere.
Schpaziere isch zwar nie my Lydeschaft gsi,
ha geng chly gleitiger a mine Ziil wöue si.
Möcht o gärn no häufe höije,
nachhär wärs schön am Schatte z löije.
Jetz wirden i müed vom umehocke,
es jagt mi mängisch fasch us de Socke.
Möcht gärn wie früecher chönne lache
aber es geit nümm so ring mi z lache mache.
I bi scho fasch e Truurwyde worde,
derby han i eigetlich kener Sorge.
Cha geng no ufschtah a mene Morge,
d Ränte längt - mues nid Gält borge.
Mi Familie isch geng lieb mit mer gsi,
warum chan i nid e chly zfridener si?
Dänk wil der Zahn der Zeit a mer gnagt
u mi rundume d Gsüchti plagt.
Wil i no nid mys Bürdeli cha trage,
ohni drüber z murre u z chlage.
S würd sicher ume schöner si
wen i mi chönnt schicke dry.
Gfröiter wär de ume ds Läbe,
aber äbe.......!
Jede schteckt i syr Hut inne,
mi cha nid hurti in e angeri schpringe,
es müessti scho es Wunder gscheh.
Ja, - es Wunder müessti gscheh.
~~~ Marie Burri ~~~
💤 Schlaf Chindli, schlaf 💤
We me z Nacht nid schlafe cha,de faht me mit schtudiere a.
Es winkt eim zwar kei Dokterhuet,
s’bringt meischtens eim ganz um e Muet.
Das Chriege u Zangge ringsum uf der Wält,
das Schtähle, Lüge u Bschysse - Sackermänt,
wie wetts eim da no glinge,
der Rank zum Schlafe chönne z finge.
Mi chunnt nid vo de Tagestheme dänne
u die mache eim gägewärtig fasch z gränne.
De chunnt me doch öppe uf angeri Troom
u fragt sich vergäbe, wie, was u warum.
Schtatt das eim e schöne Troum würd beglücke,
mues me allpot vo eir Syte uf die angeri rücke.
Am Morge, wes Zyt isch zum ufschtah,
wär de ändlich das Sandmännli da.
Uf de Ougedechle hockets schwär -
wen es doch nume früecher cho wär!
~~~ Marie Burri ~~~
Nöi Zähn 😁
Mues is ächt jetz doch no wageu nöi Zähn la mach i myne alte Tage?
Eine vo dene vier Alte wo ni no ha gha
hett bym Brotässe eifach la gah.
so bini itze nümme grad so vornähm.
Hüt han i mer die Nöie la aamässe,
so öppis tuet me gärn gleitig vergässe.
Es tuet zwar nid im gringschte weh
aber bsungersch agnähm isch es nid, nenee.
D Marlis het mi zum Zahntechniker kutschiert,
aleini hätt i das nid präschtiert.
Es tuet o hie u dert hi telefoniere
u so alles für mi arrangschiere.
Wie bin i froh, dass i so ne liebi Hälfere ha
wo für mi luegt u Outo fahre cha.
Am Zischtig mues i zum Zahnarzt gah,
dä luegt de die Ruine a,
är mues mer dä kaputnig Zahn usschrisse,
dass i ume e chli besser cha bysse.
Es isch scho lang, dass i die angere ha la zieh,
das isch dennzumal no z' Konolfinge gsi.
Jetz het sich das Zahnfleisch halt zämeglah,
weis no nid was si da müesse afah.
Tüe si mer ächt es paar Druckchnöpfli aanäije?
Lieber wärsmer, si chönnti die nöie Zähn säije.
I wett se de scho öppe bschütte
u albeneinisch es guets Tröpfli zu de Würze schütte.
Wie wär es ächt mit Biodünger,
vielicht würd i de es paar Jahr jünger.
Am Zischtig hei mer der Zahnarz ufgsuecht,
dä het mys Muul o ungersuecht.
Ha dert no einisch i dä gruusig Brei müesse bysse,
i ha doch gmeint är tüei die Zahnruine usschrisse.
Am Fritig si mer zum Herr Löi die nöie Zähn ga aaprobiere.
Syder mues i doch jetz geng studiere
ob i das ganze nid hätt sölle ungerla
u wyter die alte Proffle aleini sött la stah.
I ha nid guet chönne uf zäh zelle,
so voll hani ds Muul gha vo dene beide Gschtelle.
Das het mer d Fröid du ganz verdorbe
un i bi mi gwüss fasch röijg worde.
28.Jener
Ach wie tuet es mi scho röje
dass i Zähn ha la mache, die Nöje.
Myner tröie Alte sie z Bode gschliffe,
i ha das erscht Nächti so rächt begriffe.
Derby han i doch uf die drei alte Zähn zellt
wen es öppe nid ga sötti wie bschtellt.
Geschter am Abe, won i die truurige Räschte gseh ha
isch mer gwüss vor Chlupf fasch ds Härz blibe schtah.
Die nöje Obere si scho rächt
aber die Ungere passe mer schlächt.
Dä Morge, bym ässe vo de Gaffebroche
bin i doch unungerbroche
mit em Löffel a die nöie Zähn g’chracht
will i ds Muul viel zweni wyt ha ufgmacht.
Jetz chan i nidemal meh pfiffe,
3. Februar
Hüt het der Zahnarzt no einisch d Wurzle behandlet.
Ei Tag hei mer mit em Herr Löi verhandlet.
Han ihm ds unger Gebiss müesse zueche gä,
dass ersch no e chlei het chönne i d Kur näh.
Syder geits besser, aber dermit ässe
chan i o no hüt vergässe.
Die ungere Zähn gigampfe umenang,
dass i fasch chume ume Verschtang.
I hoffe, dass es de guet tuet gah
wen i de der Druckchnopf dranna ha.
9. Februar
Hüt si mer o ume bym Zahnarzt gsi,
no einisch, nachhär isch de das g’Vagant verby.
Fraget nid was er gmacht heig, i weis es nid,
i gseh ja nid derzue u frage tuen i nid.
Verschtah tuen i nüt vo däm Metiee
drum lan i alles mit mer la gscheh.
14. Februar
D Frou Ostertag het is hüt uf Ostermundige g’füehrt.
Der Herr Dokter het die letschte Arbeite usgfüehrt.
Dä guldig Stift het er yzementiert
(är het ds Pflaschter ohni Betonmaschine aagrüehrt)
wo de die ungere Zähn tuet feschthalte.
Der Herr Löi het im Gebiss es Gägestück müesse ypflanze.
Ohni die ungere Zähn gsehts jetz i mym Muul scho soublöd us,
i darf nid meh „unten Ohne“ vo Huus,
süsch meine de d Lüt der Graf Dracula chäm,
i wett de nid, dass si vor Chlupf Schade nähm.
Syder dass alls fertig isch, geit das ässe rächt guet
drum fassen i jetz nöie Muet.
D Rächnige si scho zahlt, i bi froh derwäge
jetzt blybt mer nume no ds danke säge.
Em Herr Dokter, de zwöi Frölein u em Herr Löi
wo alli zäme ihri Arbeit e so guet chöi.
~~~ Marie Burri ~~~
Es chlises Tröimli
Es isch eifach öppis nümm guet mit mym Chopf,i vergisse so viel, i arme Tropf,
aber o süsch isch er nid meh guet im Schtrumpf,
hets ächt drininne irgendwo e Rumpf?
I weis nid wies usechäm aber i gloube,
mi sött ne emal probiere abzschrube,
ne amene Uhremacher zueche gä,
dass ne dä chönnt usenangere näh.
Am änd isch es Redli zweni oder eis zviel,
isch afe es Glotschger, het alls zviel Schpiel.
Vilicht müesst er nume useputze u chlei öle das Wärk
aber i förchte, dä Maa würd säge, das heig e ke Wärt.
Am gschydschte tät me dä Gring zum Altise gheie
u öppe glägetlech luege für ne Nöie.
Für so ne Alti täts eigetlich e Occasion o,
die würdi doch de no e chli billiger cho.
~~~ Marie Burri ~~~
Der Heimatschutz 🏰
Potz heimatschtutz, uf e Heimatschutz da lan i nüt cho,bin i ächt fasch die einzegi, wo so isch überzügt dervo,
dass Böck doch vo eim müesse gschosse wärde.
(Für das hei mier der Heimatschutz ja äbe).
Es isch doch sicher heldemüetig,
e alti Hütte, ganz unnötig,
albeneinisch ga z bewundere
u sich derby verwundere,
dass d Müüs u d Würm so sorg zuere hei,
dass si geng no nid isch zäme gheit.
O d Fürwehr het dervor Reschpäkt,
si chönnti süsch amänd emal diräkt
e üebig ha, we mal der Luft nid blast
ach wie wär das de schad um so ne Palascht.
Gar nid e so grüüseli wyt dernäbe
isch das grosse, höche Silo äbe.
Schneewyss lüchtets us de brune Dächer,
es passt zäme wie ne Burefrou u ne Fächer,
(früecher bi de Dame sicher e Notwändigkeit,
will si wäge jedem Dräckli sig i Ohnmacht gheit.
De heig der Liebscht ere müesse Luft zuefächle,
druf sig si ume zue sich cho mit süessem Lächle).
Item, me mues jetze z’Nacht fasch verdunkle,
so tuet dä Turm im Fischtere wohlöppe funkle.
~~~ Marie Burri ~~~
Chopfschüttle
Süsch bin i ja nie e Militärgägnere gsi,aber jetz düecht mi doch si söttis la si
Milliarde für nöij Flüger us’zgä;
es wär sicher Gschyder's dermit z'ungernäh.
Im letschte Chrieg hätt mer is no chönne wehre,
jedes Bitzeli Härd isch zoge worde z Ehre.
Hätt üs denn üser Soldate nid guet bewacht,
hätt is der Hitler gleitig g’schnappt.
Hütt isch die Sach halt nid me glych,
Z viel isch verschwunde vo üsem „Härderych“.
So viel Kulturland isch vo Hüser überboue,
so mänge schöne Bitz Land vo Strasse oder Schine verhoue.
Es brucht hüt keine e Chrieg mit is a’zfah,
sofort würd mier Schwyzer ohni ässe dastah.
Da hulf is de kei Verteidigung meh,
es wär gli um üses Schwytzli gscheh.
I chas u chas eifach nid verstah,
dass das niemer wott ygseh vo dene Lüt obedra.
Jucherte um Jucherte vom Land wird versouet,
jetz wird no die Bahn zwöitusig bouet.
We scho die angere Züg blybe meischtens halbläär,
mues doch no e neue, tüüre, här.
We mer nume der Chopf vom Schüttle nid abgheie tuet bloss.
Jä nu, de wär i de myner Sorge los.
~~~ Marie Burri ~~~
Ruefmord
Jetz het e Frou ihre guet Ruef verlore,statt dass der Maa für syner Sünde müessti schmore.
Si het sicher sälber z viel z tüe gha
als dernäbe no em Maa syne Schliche nache z gah.
är het halt o gmeint är sygi ganz e Gschyde,
bi ihm mög es o grad alles verlyde.
Vilicht het är ja scho nid gwüsst,
was die bewussti Firma so alles g’rützt.
Das söll nid öppe sy e Entschuldigung,
wär z viel wott, chunnt halt de mängisch uf e Hung.
Mi sött nid uf z vielne Sitze wölle hocke,
das mues ja einisch gah i d Socke.
Da mues doch Eine d übersicht verlüre
(u näbeby vergässe z zahle syner schuldige Stüre).
We doch die Stürsünde allne Grosse uschäm,
das wär für e Staatssäckel sicher agnähm,
we nes so mängs warms Rägeli würdi gä,
nume muess me leider, leider anäh,
dass ds Parlamänt dä Säge so übermüetig tät verwalte,
dass dä warm Räge gli wär verrünnelet i vielne Spalte.
~~~ Marie Burri ~~~
Nid grad schlau
Es cha de scho no satanisch wärdeDass die Islamer fanateschi Hitzchöpf sind,
weis doch gwüss es jedes Chind.
Jetz mues doch so ne Tscholi ga
u Zündschnuer a das Pulferfass ha.
Hätt der Khomeni nid e so reagiert,
wär da gwüss nid viel passiert,
aber nach däm Würbel wei doch de Vieli läse,
was ömu o steit i däne satanische Värse.
Mi Rat: der Weschte söll die Büecher verfüüre,
uf d Gfahr hi, e chlei Prestisch z verlüüre.
Der Oschte synersyts söll nid so wüescht tue,
är tschalpet em Weschte o öppe uf d Schueh.
Leider isch nume eis sicher derby,
es wott wäger kene der Gschyder si.
Ds Uguete wird geng viel z heiss gfrässe,
anstatts la z chuele - u de z vergässe.
Wie viel Bluet mues ächt vergosse wärde,
nume wäge me Tscholi u syne satanische Värse?
~~~ Marie Burri ~~~
>Wie chunnt ächt das no use?
Es geit uf der Wält hüt afe kurlig zue, mi mues sich nume verwungere u schüttlet der Chopf derzue.
Es het doch in der EG es grosses Palaver gä,
d Bure tüei z viel produziere, was me da müess ungernäh.
Zur glyche Zyt isch ei Aabe, e Bundesrat am Fernseh cho,
är het über e Hunger brichtet, s’het eim schier überno.
We me zwöi u zwöi tuet zämezelle, gits doch o hüt no vier,
mi sött doch ds Brot la wachse, wos wachse cha, schynt mier.
D Import- u d Exportöre verdiene sich guldegi Nase hüt,
si säge, mi chönn ja alles chouffe, mi bruch doch d Bure nüt.
D Induschtri u der Handu, die si ja scho o rächt,
si bringen is Devise u sichere d Arbeitsplätz.
Doch d Waag tuet nid meh schtimme, es fählt es Züngli dra
wo o hüt no bitternötig wär für ds Glychgwicht chönne z bha.
Mi sött em hüttige Wohlschtand nid allzufescht vertroue,
us Fründe chan es Finde gä, de isch das Bang verhoue.
Si drähiti de der Hahne zue u mir wär nid parad
für hurti e Aabouschlacht z schtarte, das wär doch jammerschad.
We scho der Gäldsack voll aber der Brotsack lääre isch,
chasch ja nid Nötli frässe, muesch hungerig vom Tisch.
~~~ Marie Burri ~~~
Es gfallt mer nid
E Bytritt zu der EG gfiel mier gar nüt,dä nützti allwäg nume wenige Lüt.
Si wei eim e Bytritt schmackhaft mache,
mit em Argumänt, mi chönni de i ganz Europa schaffe.
Will es im Ussland no meh Arbeitslosi het als da inne,
würd gwüss nid mänge ussevür Arbeit finge.
Dergäge würd üses Schwyzli de überschwemmt,
houptsächlich mit Gsindel wie mes no gar nie het kennt.
Die rächte Lüt wo wett cho wärche, drückti uf d Löhn
u d Mietzinse schtigti wyter uf luftegi Höh’n.
Vor em Gsindel wär me de nienemeh sicher,
Arbeit überchäm d Polizei u d Richter.
De sött me aber sofort ufruume
mit de hüttige Samethändschlituure.
Wen ig die Sach hüt allzuschwarz gseh,
tuen i mi entschuldige i paarne Jahre de.
Lieber wärs mer scho, wen es blybti wies isch,
das es nid gäb no es grössersch Völkergmisch.
~~~ Marie Burri ~~~
🕺🐎 Wildwescht im Bett
Was cha me doch z Nacht im Troum erläbe,Sache wos i Würklechkeit nie git uf ärde.
Bi letschti Nacht gritte u eme stolze Schümu,
ha gmeint es gang gradwägs i Himu.
Mir si aber zum Glück doch am Bode blibe
un i ha mer ärschtig der Angschtschweiss abgribe.
Fescht ha ni mi gha a däm Zoumzüüg,
dass i ja nid öppe ache flüg.
Das Ross isch galoppiert geng wyter u wyter,
uf ds mal steit vorzueche es höchs, ysigs Gitter.
Der Goul nimmt e Gump wyt drüber us,
s’isch gange nume so im Schnuss.
Aber jetz, wie isch ächt das o gscheh,
hocken i verchert uf em Ross, o je.
Statt de Zügel han i der Schwanz i de Händ,
gross isch jetze mys Eländ.
Wyter geit die schrecklechi Hatz
u plötzlech hocken i uf ere Chatz.
Jetz isch es nümm so gleitig gange
aber wo si wott e Muus yfange,
nimmt o die Chatz e grosse Satz
u beförderet mi dermit a ne Platz
wos mer viel besser gfalle hett,
i bi erwachet i mym Bett.
Es isch zwar ghörig vernuschet gsi,
aber i ha mi zfride gschickt da dry.
Won i mers dä Morge bym Erwache
ha vorgstellt, han i doch müesse lache.
S’isch ja nur es chlyses Tröimli gsi,
Tröimli si ja doch so schnäll verby.
~~~ Marie Burri ~~~
Schämet nech 😕
Me het scho früecher öppe gseit,es syg scho mänge uf d Nase gheit,
wo syg uf höcheri Schuele gange
u heigi dert e Mordshochmuet ygfange.
We sy es schöns ämtli hei
füehle sy sich frank u frei,
sy leischte sich e grossi Schese,
natürlich, wes e chlei geit, uf Schpeese.
We der Lohn o so no nid längt,
wärde halt angeri Chrämpfli dürezwängt.
Mi dänkt, es chönn eim nüt uscho,
mi heig ja ne Supergring, oho!
My tüecht, es syg eine scho ne Löu,
er heig am Huet e Huuffe öl,
wen är trotz eme höche Lohn
no mues bschisse - s isch e Hohn.
Es isch scho mänge ir Chefi glandet,
wo isch uf chrumme Wäge gwandlet.
Isch aber eine scho Millionär,
fallt em Richter ds rächt richte schwär;
er seit zu däm Lump: "gang hei liebe Maa,
i chlage de derfür es chliners Fischli a."
~~~ Marie Burri ~~~
Ende Band drü vo vierne »Gedichte und Geschichten von Marie Burri«